Kappadokien

Kappadokie (türkisch Kapadokya, griechisch Καππαδοκία, dt. au Kappadozien) isch e Landschaft in Zentraalanatolie in dr Türkei.

S Gebiet, wo as Kappadokie bezäichnet wird, umfasst hützudaags hauptsächlig d Browinze Nevşehir, Niğde, Aksaray, Kırşehir und Kayseri. Äine vo de bekanntiste Ört isch Göreme mit sinere Hööliarchidektuur, wo us em wäiche Tuff uusegmäislet worden isch. Göreme gältet as s Zentrum vo Kappadokie, dr äinzigartigi Komplex us Felseformazioone dört isch vo dr Unesco 1985 zum Wältkulturerb ernennt worde. En anderi Bsunderhäit si die vile underirdische Stedt, wo Kaymaklı und Derinkuyu am bekanntiste si. Si si sit de 1960er Joor usgrabt worde. Anderi bekannti Stedt si Ürgüp und Avanos.